പൊന്നാനി മിനി വൈദ്യുതി ഭവനത്തിന് കെട്ടിടം യാഥാർത്ഥ്യമാകുന്നു

പൊന്നാനി മിനി വൈദ്യുതി ഭവനത്തിൻ്റെ    കെട്ടിട നിർമ്മാണോദ്ഘാടനം ഓൺലൈൻ വഴി വൈദ്യുതി വകുപ്പ് മന്ത്രി എം.എം മണി നിർവഹിച്ചു.   സ്പീക്കർ പി.ശ്രീരാമകൃഷ്ണൻ അധ്യക്ഷനായി.  പൊന്നാനി നഗരസഭാ ഹാളിൽ നടന്ന ചടങ്ങിൽ കെട്ടിടത്തിൻ്റെ ശിലാഫലകം സ്ഥാപനം സ്പീക്കർ പി.ശ്രീരാമകൃഷ്ണൻ നിർവഹിച്ചു.

പുതിയ കെട്ടിടം വരുന്നതോടെ  കെഎസ്ഇബി പൊന്നാനി ഇലക്ട്രിക്കൽ ഡിവിഷൻ ഓഫീസിന് വാടക കെട്ടിടത്തിൽ നിന്ന് മോചനമാകും. രണ്ട് കോടി അൻപത്തി രണ്ട് ലക്ഷം ചെലവഴിച്ചാണ് പൊന്നാനി സബ്സ്റ്റേഷൻ കോമ്പൗണ്ടിൽ പുതിയ കെട്ടിടം ഒരുക്കുന്നത്. വാടക കെട്ടിടത്തിൽ പ്രവർത്തിക്കുന്ന പൊന്നാനി, ഈഴുവത്തിരുത്തി സെക്ഷൻ ഓഫീസ്, പൊന്നാനി സബ്‌ ഡിവിഷൻ ഓഫീസ്, പൊന്നാനി ഡിവിഷൻ ഓഫീസ് എന്നി നാല് ഓഫിസുകളാണ് പുതിയ കെട്ടിടത്തിലേക്ക് മാറുക.

നിർമ്മാണോദ്ഘാടന ചടങ്ങിൽ പൊന്നാനി നഗരസഭ ചെയർമാൻ ശിവദാസ് ആറ്റുപുറം, മറ്റു ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.