എല്ലാ തീവ്രവാദികളും വളർന്നു തുടങ്ങുന്നത് മദ്രസയിലാണെന്ന മധ്യപ്രദേശ് മന്ത്രിയുടെ പ്രസ്താവന വിവാദത്തിൽ

ഇന്ദോർ: തീവ്രവാദികൾ വളരുന്നത് മദ്​റസകളിലെന്ന മധ്യപ്രദേശ് മന്ത്രി ഉഷ താക്കൂറിന്‍റെ പ്രസ്താവന വിവാദത്തിൽ. ഇന്ദോറിൽ നടത്തിയ വാർത്താസമ്മേളനത്തിലാണ് എല്ലാ തീവ്രവാദികളും മദ്​റസകളിലാണ് വളരുന്നതെന്ന പരാമർശം ഉഷ താക്കൂർ നടത്തിയത്.

തീവ്രവാദികൾ ജമ്മു കശ്മീരിനെ ഒരു തീവ്രവാദ ഫാക്ടറിയാക്കി മാറ്റിയെന്നും മന്ത്രി ആരോപിച്ചു. ദേശീയത പാലിക്കാൻ കഴിയാത്ത മദ്​റസകൾ, നിലവിലുള്ള വിദ്യാഭ്യാസ സമ്പ്രദായവുമായി ലയിപ്പിച്ച് സമൂഹത്തിന്‍റെ സമ്പൂർണ പുരോഗതി ഉറപ്പാക്കണമെന്നും ഉഷ താക്കൂർ ആവശ്യപ്പെട്ടു. 

നിങ്ങൾ ഈ രാജ്യത്തെ ഒരു പൗരനാണെങ്കിൽ, എല്ലാ തീവ്രവാദികളും മദ്​റസയിൽ പഠിച്ചതായി കാണാമെന്ന് സദസിനോട് മന്ത്രി പറഞ്ഞു. കുട്ടികളെ ദേശീയതയുമായി ബന്ധിപ്പിക്കുന്നതിൽ മദ്​റസകൾ പരാജയപ്പെടുന്നതായും ഉഷ താക്കൂർ പറഞ്ഞു. 

സർക്കാർ നിയന്ത്രണത്തിൽ പ്രവർത്തിക്കുന്ന മദ്​റസകൾ അടച്ചുപൂട്ടുമെന്ന് അസം ധനകാര്യ-ആസൂത്രണ വകുപ്പ്​ മന്ത്രി ഹിമന്ദ ബിസ്വ ശർമ കഴിഞ്ഞ ദിവസം വ്യക്തമാക്കിയിരുന്നു. ഇക്കാര്യം ചൂണ്ടിക്കാട്ടിയാണ് ഇന്ദോറിൽ നിന്നുള്ള ബി.ജെ.പി എം.എൽ.എ കൂടിയായ ഉഷ താക്കൂറിന്‍റെ വിവാദ പരാമർശം.