പൊന്നാനിയിൽ അയലയും ചെമ്പാനും ചെറുമീനുകളും; ചെറുവള്ളങ്ങൾക്ക് നല്ല കോള്.
പൊന്നാനി: ഫിഷിങ് ഹാർബറിൽ വള്ളങ്ങൾക്ക് ആശ്വാസ ചാകര. ബോട്ടുകാർക്ക് ഇപ്പോഴും കഷ്ടകാലം. വള്ളങ്ങൾക്ക് മുൻപില്ലാത്ത വിധം മത്സ്യം ലഭിക്കുന്നുണ്ട്. അയലയും ചെമ്പാനും ചെറുമീനുകളും കൊണ്ട് ഇന്നലെ ലേല ഹാൾ നിറഞ്ഞിരുന്നു. ഉച്ചയ്ക്ക് ശേഷവും നിറയെ മീനുമായി വള്ളങ്ങൾ തീരമടുത്തുകൊണ്ടിരുന്നു. അയല കാര്യമായി ലഭിച്ചു തുടങ്ങിയതോടെ വിലയിലും ഇടിവു സംഭവിച്ചു. വലിയ അയല കിലോഗ്രാമിന് 110 രൂപയ്ക്കും ചെറിയ അയല 30 രൂപയ്ക്കുമാണ് ലേലത്തിൽ വിറ്റഴിച്ചത്.
മാസങ്ങളുടെ ഇടവേളയ്ക്കു ശേഷമാണ് പൊന്നാനി കടപ്പുറത്ത് വള്ളക്കാർക്ക് ആശ്വാസത്തിനുള്ള വകയെത്തുന്നത്. കടൽ തെളിഞ്ഞ അന്തരീക്ഷത്തിലാണ്. അതേസമയം, ബോട്ടുകാർക്ക് കഷ്ടകാലം തീർന്നിട്ടില്ല. ആഴക്കടൽ മത്സ്യങ്ങളുടെ ലഭ്യതയിൽ വൻ ഇടിവു സംഭവിച്ചുകൊണ്ടിരിക്കുകയാണെന്ന് മത്സ്യത്തൊഴിലാളികൾ പറയുന്നു. ബോട്ടുകൾ മീൻപിടിത്തത്തിനിറങ്ങിയാൽ കൂലിക്കുള്ള വക പോലും കിട്ടാതായതോടെ മിക്ക ബോട്ടുകാരും കടലിലിറങ്ങാതായി.
#360malayalam #360malayalamlive #latestnews
