പൊന്നാനിയിൽ സംഘർഷം; യുഡിഎഫ് നേതാവിനെതിരെ ജാമ്യമില്ലാ കേസ്
പൊന്നാനി: തിരഞ്ഞെടുപ്പ് പ്രചാരണത്തിടെ പൊന്നാനി പുല്ലോണത്ത് അത്താണിയിൽ ചൊവ്വാഴ്ച വൈകീട്ടുണ്ടായ സംഘർഷത്തിൽ സ്പീക്കർ ശ്രീരാമകൃഷ്ണന്റെ പേഴ്സണൽ സ്റ്റാഫ് അംഗത്തിന് പരിക്ക്. പരിക്കേറ്റ കടപ്രത്തകത്ത് സാദിഖിനെ പൊന്നാനി താലൂക്ക് ആശുപത്രിയിൽ പ്രവേശിപ്പിച്ചു. സംഭവത്തിൽ ഒരാളെ പോലീസ് അറസ്റ്റ് ചെയ്തു. വെളുത്തേടത്ത് പറമ്പിൽ സുബിലാലിനെ (32)യാണ് അറസ്റ്റുചെയ്തത്. ബാലസംഘത്തിന്റെ നേതൃത്വത്തിൽ കുട്ടികൾ നടത്തിയ തിരഞ്ഞെടുപ്പ് പ്രചാരണജാഥയിലെ പ്രശ്നം പരിഹരിക്കാനായി സ്ഥലത്തെത്തിയ സാദിഖിനെ സുബിലാലും സംഘവും ചേർന്ന് മർദ്ദിക്കുയായിരുന്നൂവെന്ന് പോലീസ് പറഞ്ഞു. ജാഥയിലുണ്ടായിരുന്ന ഒരു കുട്ടിക്കും പരിക്കേറ്റിട്ടുണ്ട്. സംഭവത്തിൽ കണ്ടാലറിയാവുന്ന എട്ടോളം പേർക്കെതിരേ പോലീസ് കേസെടുത്തു.
സുബിലാലിനെ അറസ്റ്റുചെയ്തതിൽ പ്രതിഷേധിച്ച് ബുധനാഴ്ച രാത്രി യു.ഡി.എഫ്. പ്രവർത്തകർ പൊന്നാനി പോലീസ്‌സ്റ്റേഷൻ ഉപരോധിച്ചു. രാഷ്ട്രീയ പകപോക്കൽ നടത്തുകയാണ് പോലീസ് എന്നും സുബിലാലിനെ ജാമ്യമില്ലാവകുപ്പുപ്രകാരമാണ് അറസ്റ്റുചെയ്തതെന്നും യു.ഡി.എഫ്. നേതാക്കൾ ആരോപിച്ചു.
#360malayalam #360malayalamlive #latestnews
