ഏതു പഴയ ബൈക്കുകളും കുറഞ്ഞ ചെലവിൽ വൈദ്യുതിയിലേക്ക് മാറ്റാം
കുറ്റിപ്പുറം: നിങ്ങളുടെ കൈവശം 15 വർഷം പഴക്കമുള്ള ബൈക്കുണ്ടോ..? ഉണ്ടെങ്കിൽ കുറഞ്ഞ ചെലവിൽ നിങ്ങൾക്കതിനെ ഇലക്ട്രിക്ക് ബൈക്ക് ആക്കി മാറ്റാം. കുറ്റിപ്പുറം എം.ഇ.എസ്. എൻജി. കോളേജിലെ മെക്കാനിക്കൽ വിദ്യാർഥികളാണ് പുതിയ ആശയത്തിനു പിന്നിൽ. 15 വർഷം കഴിഞ്ഞ ബൈക്കുകൾ തുടർന്ന് ഉപയോഗിക്കണമെങ്കിൽ റീരജിസ്ട്രേഷൻ നടത്തേണ്ടതുണ്ട്. കാലപ്പഴക്കത്താൽ നശിച്ചുതുടങ്ങിയ ബൈക്കുകൾ വീണ്ടും രജിസ്റ്റർചെയ്ത് ഉപയോഗിക്കുന്നതിനുപകരം അവ ഇലക്ട്രിക് ബൈക്കുകളാക്കി രൂപമാറ്റം വരുത്തുന്ന വിദ്യയാണ് വിദ്യാർഥികൾ കണ്ടുപിടിച്ചിരിക്കുന്നത്.
അവസാനവർഷ മെക്കാനിക്കൽ വിദ്യാർഥികളായ ആദിൽ അലി, സി.പി. ആദിൽ, അഥിൻ ഗോപുജ്, കെ.എം. അഫ്സൽ മുഹമ്മദ് എന്നിവരാണ് കണ്ടുപിടിത്തത്തിന് പിന്നിൽ. മെക്കാനിക്കൽ മേധാവി ഡോ. ഐ. റഹുമ്മത്തുൻസ, എം.ജി. പ്രിൻസ്, അലി, ബേബി, ഇലക്ട്രിക്കൽ വിഭാഗം അധ്യാപകനായ ഷാഫി എന്നിവരുടെ നേതൃത്വത്തിലാണ് ബൈക്ക് രൂപമാറ്റം വരുത്തിയത്. ഇങ്ങനെ പരിഷ്കരിക്കുന്നതിലൂടെ വാഹനം ദീർഘകാലം ഉപയോഗിക്കാനാവും. വാഹനങ്ങളിൽ നിന്നുണ്ടാകുന്ന മലിനീകരണവും ഇതുവഴി വലിയതോതിൽ കുറയ്ക്കാനാവും. നിലവിൽ മാർക്കറ്റിൽ 60,000 രൂപ മുതലാണ് ഇലക്ട്രിക് സ്കൂട്ടറുകളുടെ വില. 15,000 രൂപ മുടക്കിയാൽ ബൈക്കിനെ ഇലക്ട്രിക് പതിപ്പിലേക്ക് മാറ്റാനാകുമെന്നാണ് പ്രത്യേകത. വീട്ടിൽത്തന്നെ ചാർജ് ചെയ്യാൻ പറ്റുന്നവയാണ് ഇവ. ഏഴ് മണിക്കൂർ ചാർജ് ചെയ്താൽ 100 കിലോമീറ്ററോളം സഞ്ചരിക്കാൻ പറ്റും.
#360malayalam #360malayalamlive #latestnews