തൃക്കണ്ണുമായി കുറ്റിപ്പുറം പോലീസ്

കുറ്റിപ്പുറം : നിയമലംഘനങ്ങൾ കണ്ടെത്താൻ പ്രധാന സ്ഥലങ്ങളിൽ പോലീസ് ക്യാമറകൾ സ്ഥാപിച്ചു. ദേശീയപാതയിലെ കുറ്റിപ്പുറം പാലത്തിന് മുകളിൽ ഉൾപ്പെടെ ക്യാമറകൾ സ്ഥാപിച്ചുകഴിഞ്ഞു. ജില്ലാ പോലീസ് മേധാവി യു. അബ്ദുൽകരീം സ്വിച്ച്ഓൺ കർമം നിർവഹിച്ചു. പല കേസുകളിലും പ്രതികളെ കണ്ടെത്താനും യാഥാർഥ്യം മനസ്സിലാക്കാനും പോലീസിന് ഏറെ ബുദ്ധിമുട്ടേണ്ടിവരുന്നുണ്ട്. ക്യാമറകൾ പ്രവർത്തനസജ്ജമായതോടെ ഹെൽമെറ്റ് ധരിക്കാത്തത് ഉൾപ്പെടെയുള്ള നിയമലംഘനങ്ങൾ പോലീസിന് കണ്ടെത്താൻ കഴിയും.

കുറ്റിപ്പുറം പാലത്തിലും മിനിപമ്പ ജങ്ഷനിലും ഉൾപ്പെടെ വിവിധയിടങ്ങളിലായി അമ്പതോളം ക്യാമറകൾ സ്ഥാപിച്ചിട്ടുണ്ട്. വാഹനങ്ങളുടെ നമ്പർ കൃത്യമായി പകർത്തുന്ന ക്യാമറകളാണ് സ്ഥാപിച്ചിട്ടുള്ളത്. വ്യാപാരികൾ, സന്നദ്ധ സംഘടനകൾ തുടങ്ങിയവരുടെ സഹായത്തോടെയാണ് ക്യാമറകൾ സ്ഥാപിച്ചതെന്ന് ഇൻസ്‌പെക്ടർ ശശീന്ദ്രൻ മേലേയിൽ അറിയിച്ചു. പോലീസ് സ്‌റ്റേഷനിലാണ് കൺട്രോൾറൂം സജ്ജീകരിക്കുക. തിരൂർ ഡിവൈ.എസ്.പി. കെ.എ. സുരേഷ് ബാബു അധ്യക്ഷനായി.