ഇബ്രാഹിംകുഞ്ഞ് ആശുപത്രിയിൽ തുടരും; കസ്റ്റഡി അപേക്ഷയും ജാമ്യാപേക്ഷയും നാളെ പരിഗണിക്കും

കൊച്ചി: പാലാരിവട്ടം പാലം നിർമാണവുമായി ബന്ധപ്പെട്ട അഴിമതി കേസിൽ അറസ്​റ്റിലായ മുൻ മന്ത്രി ഇബ്രാഹിം കുഞ്ഞിനെ വിജിലൻസ്​ കോടതി റിമാൻഡ്​ ചെയ്​തു. ജ്യാമ്യാപേക്ഷ കോടതി നാളെ പരിഗണിക്കും. രാഷ്​ട്രീയപ്രേരിതമായാണ്​ തന്നെ അറസ്​റ്റ്​ ചെയ്​തതെന്ന്​​ അദ്ദേഹം ജാമ്യാപേക്ഷയിൽ വ്യക്​തമാക്കി​. അദ്ദേഹം ചികിത്സയിൽ കഴിയുന്ന കൊച്ചി ലേക്​ഷോർ ആശുപത്രിയിൽ ​എത്തിയാണ്​ മുവാറ്റുപുഴ വിജിലൻസ്​ കോടതി ജഡ്​ജി​ റിമാൻഡ്​ രേഖ​പ്പെടുത്തിയത്​. ഇബ്രാഹിംകുഞ്ഞിന് തുടർചികിത്സ ആവശ്യമാണെന്ന് ഡോക്ടർമാർ വിജിലൻസിനെ അറിയിച്ചതിനാൽ ആശുപത്രിയിൽ തുടരാനും അനുമതി നൽകി.

അതേസമയം ഇബ്രാഹിം കുഞ്ഞിനെ നാല്​ ദിവസം കസ്​റ്റഡിയിൽ വേണമെന്ന്​ വിജിലൻസ്​ ആവശ്യപ്പെട്ടിട്ടുണ്ട്​. ഇതിനായി വിജിലൻസ്​ കസ്​റ്റഡി അപേക്ഷ കോടതിയിൽ നൽകി. ഇന്ന് രാവിലെയാണ് മുൻമന്ത്രിയും ലീഗ്​ നേതാവുമായ ഇബ്രാഹിം കുഞ്ഞിനെ വിജിലൻസ് അറസ്റ്റ് ചെയ്തത്. രാവിലെ വിജിലൻസ് സംഘം വസതിയിലെത്തിയിരുന്നെങ്കിലും അദ്ദേഹം ആശുപത്രിയിലാണെന്ന വിവരമാണ് ലഭിച്ചത്. തുടർന്ന് ആശുപത്രിയിലെത്തി അറസ്റ്റ് രേഖപ്പെടുത്തുകയായിരുന്നു.