എടപ്പാൾ മേൽപ്പാലം : പ്രധാന സ്പാൻ നിർമാണം തുടങ്ങി
എടപ്പാൾ: മേൽപ്പാലത്തിന്റെ പ്രധാനമായ സ്പാൻ നിർമാണത്തിന് തുടക്കമായി.
തൃശ്ശൂർ, കോഴിക്കോട് റോഡിൽ പാലത്തിന്റെ 220 മീറ്ററിലുള്ള പണികളാണ് ഇതുവരെ നടന്നിരുന്നത്. ഇവ തമ്മിൽ കൂട്ടി യോജിപ്പിക്കുന്ന സ്പാൻ നിർമാണമാണ് ഇപ്പോൾ തുടങ്ങിയത്.
തൃശ്ശൂർ-കോഴിക്കോട്, പാലക്കാട്-പൊന്നാനി റോഡുകൾ സംഗമിക്കുന്ന സ്ഥലത്താണ് ഈ സ്പാൻ നിർമിക്കുന്നത്. ഇതു വഴിയാണ് നാലു റോഡുകളിലേക്കുമുള്ള ആയിരക്കണക്കിന് വാഹനങ്ങൾ കടന്നുപോകുന്നത്. ഇതിനുള്ള സ്ഥലം ഇവിടെ ഒഴിച്ചിട്ടായിരുന്നു രണ്ടു വർഷമായുള്ള പണികളത്രയും.
സ്പാൻ നിർമാണമാരംഭിച്ചതോടെ ഈ ഭാഗത്ത് പത്തടിയൊഴികെയുള്ള സ്ഥലങ്ങളത്രയും നിർമാണത്തിനായി വളച്ചെടുത്തുകഴിഞ്ഞു. ഇവിടെ രണ്ടുഭാഗമാക്കിത്തിരിച്ചാണ് ഇപ്പോൾ പൊന്നാനി റോഡിൽനിന്നും പട്ടാമ്പി റോഡിൽനിന്നും കുറ്റിപ്പുറം റോഡിൽനിന്നുമുള്ള വാഹനങ്ങൾ ഊഴമിട്ട് കടത്തിവിടുന്നത്.
പോലീസും ഹോംഗാർഡും വൊളന്റിയർമാരുമെല്ലാം ഏറെ പ്രയാസപ്പെട്ടാണ് ഗതാഗത നിയന്ത്രണം നടത്തുന്നത്. പലപ്പോഴും വലിയ ഗതാഗതക്കുരുക്കും ഇതുമൂലമുണ്ടാകുന്നു
#360malayalam #360malayalamlive #latestnews
