"ഓർമ്മപ്പെയ്ത്ത് " മെഗാ അലുംനി സംഗമം സെപ്റ്റംബർ നാലിന്

മാറഞ്ചേരി ഗവ. ഹയർസെക്കണ്ടറി സ്കൂൾ ''സഹപാഠി'' പൂർവ്വവിദ്യാർത്ഥി കൂട്ടായ്മയും സ്കൂൾ വികസന സമിതിയും സംയുക്തമായി സംഘടിപ്പിക്കുന്ന  സമ്പൂർണ്ണ അദ്ധ്യാപക-വിദ്യാർത്ഥി സംഗമമായ  ''ഓർമ്മപെയ്ത്ത്'' സെപ്തംബർ നാലിന് നടക്കുമെന്ന് ഭാരവാഹികൾ വാർത്താ സമ്മേളനത്തിൽ പറഞ്ഞു. ഫിഷറീസ് - വഖഫ് - സ്പോർട്ട്സ് മന്ത്രി വി. അബ്ദുറഹിമാൻ പരിപാടി ഉദ്ഘാടനം ചെയ്യും. 

  എം. എൽ. എ പി. നന്ദകുമാർ , ഇ.ടി.മുഹമ്മദ് ബഷീർ എം. പി, കേരള പബ്ലിക്ക് സർവ്വീസ് കമ്മീഷൻ ചെയർമാൻ അഡ്വ. എം.കെ സക്കീർ , ജില്ലാ പഞ്ചായത്ത് പ്രസിഡന്റ് എം.കെ റഫീഖ തുടങ്ങിയവർ പങ്കെടുക്കും. അയ്യായിരത്തോളം പൂർവ്വ വിദ്യാർത്ഥികളും നൂറിലധികം പൂർവ്വ അധ്യാപകരും സംഗമത്തിൽ പങ്കെടുക്കും.

ബാച്ചുകളുടെ സംഗമം, പൂർവ്വ അധ്യാപകരെ ആദരിക്കൽ , കലാപരിപാടികൾ തുടങ്ങിയവ നടക്കും.  കഴിഞ്ഞ ഒരു നൂറ്റാണ്ടിലാധികമായി പ്രവർത്തിക്കുന്ന പ്രദേശത്തെ മികച്ച സർക്കാർ വിദ്യാലയങ്ങളിലൊന്നാണ് മാറഞ്ചേരി ഗവ.ഹയർ സെക്കണ്ടറി സ്കൂൾ. കഴിഞ്ഞ നൂറ്റാണ്ടിന്റെ തുടക്കത്തിൽ (1904ൽ) എൽ.പി.സ്കൂളായി ആരംഭിച്ച ഈ വിദ്യാലയം ഇന്ന് പ്രീപ്രൈമറി മുതൽ ഹയർ സെക്കണ്ടറി വരെ 4000 ൽ പരം വിദ്യാർത്ഥികൾ പഠിക്കുന്ന ജില്ലയിലെ ഏറ്റവും വലിയ സർക്കാർ വിദ്യാലയമാണ്. ഒരു പ്രൈമറി വിദ്യാലത്തിന് വേണ്ട സ്ഥലം പോലും ഈ സ്കൂളിനില്ല. 120 സെന്റ് സ്ഥലത്താണ് ഇത്രയും കുട്ടികൾ ഞെങ്ങി ഞെരുങ്ങി പഠനം നടത്തുന്നത്. ഈ വിർപ്പ് മുട്ടൽ അവസാനിപ്പിക്കുന്നതിന് സ്കൂൾ വികസന സമിതിയുടെ നേതൃത്വത്തിൽ ഒരു ഏക്കർ സ്ഥലം വാങ്ങുന്നതിനുള്ള ശ്രമങ്ങൾ ആരംഭിച്ചിട്ടുണ്ട്. എം.എൽ എ യുടെ ആസ്തി ഫണ്ടും ജില്ലാ പഞ്ചായത്ത് ഫണ്ടും പൊതുജനങ്ങളിൽ നിന്ന് ശേഖരിക്കുന്ന സംഭാവനയും ഉപയോഗപ്പെടുത്തിയാണ് സ്ഥലം വാങ്ങാൻ തീരുമാനിച്ചിരിക്കുന്നത്.

ഒരു നൂറ്റാണ്ടിന് ശേഷം നടക്കുന്ന ഓർമ്മപ്പെയ്ത്ത് എന്ന മെഗാ അലുംനി സംഗമം വൻ വിജയമാക്കുന്നതിന് പൂർവ്വ വിദ്യാർത്ഥികളും അധ്യാപകരും ഒറ്റക്കെട്ടായി രംഗത്തിറങ്ങിയിരിക്കുകയാണ്. ഈ സ്കൂളിൽ നിന്ന് പഠിച്ചിറങ്ങിയ അമ്പതോളം SSLC ബാച്ചിലേയും ഇരുപത്തിരണ്ട് പ്ളസ്ടു ബാച്ചിലെയും അതിന് മുമ്പ് പഠിച്ചിറങ്ങിയ യു പി., എൽ.പി. വിദ്യാർത്ഥികളെയും ഈ മെഗാ സംഗമത്തിൽ പങ്കെടുപ്പിക്കുന്നതിനുള തീവ്ര യജ്ഞങ്ങൾ നടത്തി കൊണ്ടിരിക്കുകയാണെന്നും ഭാരവാഹികൾ പറഞ്ഞു.

 വാർത്താ സമ്മേളനത്തിൽ ബ്ലോക്ക് പഞ്ചായത്ത് പ്രസിഡന്റ് ഇ.സിന്ധു , വികസന സമിതി ചെയർമാൻ വി.ഇസ്മായിൽ മാസ്റ്റർ, സഹപാഠി ചെയർമാൻ എ.അബ്ദുൾ ലത്തീഫ്, ഓർമ്മപ്പെയ്ത്ത് ചെയർമാൻ മംഗലത്തേൽ ഖാലിദ്, കൺവീനർ കൃഷ്ണകുമാർ മാസ്റ്റർ, ഖദീജ മുത്തേടത്ത്, പ്രിൻസിപ്പാൾ, ഹെഡ് മാസ്റ്റർ, പി.ടി.എ.പ്രസിഡന്റ് എന്നിവർ പങ്കെടുത്തു.