ഇന്ന് 75,760 രോഗികൾ ; ലോകത്ത് 24 മണിക്കൂറിനിടെ ഏറ്റവും കൂടുതൽ കേസുകൾ റിപ്പോർട്ട് ചെയ്തത് ഇന്ത്യയിൽ

ഒറ്റ ദിവസം 75000 ത്തിലധികം കോവിഡ് കേസുകൾ റിപ്പോർട്ട് ചെയ്യപ്പെട്ടതോടെ ഇന്ത്യയിലെ കോവിഡ് കേസുകൾ 33 ലക്ഷം കടന്നു. 75,760 പുതിയ കേസുകളാണ് കഴിഞ്ഞ 24 മണിക്കൂറിനിടെ ഇന്ത്യയിൽ റിപ്പോർട്ട് ചെയ്യപ്പെട്ടത്. ഒറ്റ ദിവസം ഇന്ത്യയിൽ ആദ്യമായാണ് ഇത്രയധികം കേസുകൾ റിപ്പോർട്ട് ചെയ്യപ്പെടുന്നത്. 1023 പേരാണ് 24 മണിക്കൂറിനിടെ കോവിഡ് ബാധിതരായി ഇന്ത്യയിൽ മരിച്ചത്. 33,10,235 പേർക്കാണ് ഇതുവരെ ഇന്ത്യയിൽ കോവിഡ് സ്ഥിരീകരിച്ചത്. ഇതിൽ 7,25,991 പേർ നിലവിൽ ചികിത്സയിലുള്ളവരാണ്. 60,472 പേർ ഇതുവരെ ഇന്ത്യയിൽ കോവിഡ് ബാധിതരായി മരിച്ചു. 25 ലക്ഷത്തിലധികം പേർ ഇന്ത്യയിൽ ഇതിനോടകം രോഗമുക്തി നേടിയിട്ടുണ്ട്.

worldometer കണക്കു പ്രകാരം നിലവിൽ ലോകത്തു തന്നെ ഒരു ദിവസം ഏറ്റവും കൂടുതൽ കേസുകൾ റിപ്പോർട്ട് ചെയ്യപ്പെട്ടത് ഇന്ത്യയിലാണ്-75,760. രണ്ടാം സ്ഥാനത്തുള്ള ബ്രസീലിൽ ഒറ്റ ദിവസം റിപ്പോർട്ട് ചെയ്യപ്പെട്ടത് 47,828 കേസുകളാണ്. യുഎസ്സിൽ ഒറ്റദിവസത്തിനിടെ കോവിഡ് ബാധിതരായി മരിച്ചത് 1,289 പേരാണ്. 1090 പേർ ബ്രസീലിലും 1023 പേർ ഇന്ത്യയിലും കോവിഡ് ബാധിതരായി 24 മണിക്കൂറിനിടെ മരിച്ചു.