വിശപ്പ് രഹിത പൊന്നാനി; നഗരസഭയുടെ മൂന്നാമത് ജനകീയ ഹോട്ടൽ കൂടി പ്രവർത്തനം ആരംഭിച്ചു
ഇരുപത് രൂപയ്ക്ക് ഉച്ചയൂണ് നൽകുന്ന മൂന്നാമത് ജനകീയ ഹോട്ടലിന് കൂടി പൊന്നാനി നഗരസഭയിൽ തുടക്കമായി. സംസ്ഥാന സർക്കാരിൻ്റെ വിശപ്പു രഹിത കേരളം പദ്ധതിയുടെ ഭാഗമായാണ് പൊന്നാനിയിലെ മൂന്നാമത് ജനകീയ ഹോട്ടൽ പ്രവർത്തനമാരംഭിച്ചത്. സംസ്ഥാനത്തെ 1181ാമത്തെ ജനകീയ ഹോട്ടൽ കൂടിയാണിത്. പൊന്നാനി ചന്തപ്പടി അക്ബർ അക്കാദമി കെട്ടിടത്തിലാണ് ഹോട്ടൽ പ്രവർത്തിക്കുന്നത്. സാധാരണക്കാർക്ക് ഏറെ പ്രയോജനകരമായ 20 രൂപയുടെ ഊണ്, കൂടുതൽ വ്യാപിക്കുന്നതിനാണ് നഗരസഭ ലക്ഷ്യം വയ്ക്കുന്നത്. നഗരസഭയുടെ ആദ്യത്തെ ജനകീയ ഹോട്ടൽ 2020 ഒക്ടോബർ 2 ന് പുളിക്കകടവിലാണ് പ്രവർത്തനം ആരംഭിച്ചത്. രണ്ടാമത് ജനകീയ ഹോട്ടൽ സിവിൽ സ്റ്റേഷൻ കോമ്പൗണ്ടിലും പ്രവർത്തിച്ചു വരുന്നു.
നഗരസഭയുടെ മൂന്നാമത് ജനകീയ ഹോട്ടലിൻ്റ ഉദ്ഘാടനം എം.എൽഎ പി.നന്ദകുമാർ നിർവ്വഹിച്ചു. നഗരസഭാ ചെയർമാൻ ശിവദാസ് ആറ്റുപുറം അധ്യക്ഷത വഹിച്ച ചടങ്ങിൽ വൈസ് ചെയർപേഴ്സൺ ബിന്ദു സിദ്ധാർത്ഥൻ, സ്ഥിരം സമിതി ചെയർമാൻമാരായ രജീഷ് ഊപ്പാല, എം.ആബിദ, ഷീനാസുദേശൻ, കൗൺസിലർമാരായ അഡ്വ.ബിൻസി ഭാസ്കർ, ഷാഫി, നിഷാദ്, നസീമ, രഞ്ജിനി, ശ്രീകല സി.ഡി.എസ് ഭാരവാഹികളായ ധന്യ.എം, ഫംസിയ, ആയിഷാബി, ഹഫ്സത്ത്, മെമ്പർ സെക്രട്ടറി മോഹനൻ, ജെ.എച്ച്.ഐ സുഷ, കെ.വി സനോജ്, സംരഭക ഭാരവാഹികളായ സി.കെ മിനി, ശ്രീദേവി തുടങ്ങിയവർ സംബന്ധിച്ചു.
#360malayalam #360malayalamlive #latestnews