വയോജന ദിനത്തിൽ പ്രായമായ മുൻ ജനപ്രതിനിധികൾക്ക് ആദരം നൽകി പൊന്നാനി നഗരസഭ

ജീവിതത്തിൻ്റെ വസന്തക്കാലം പൊതുജന സേവനത്തിന് മാറ്റി വെച്ച മുൻകാല ജനപ്രതിനിധികളെ ആദരിച്ച് പൊന്നാനി നഗരസഭ. ലോക വയോജന ദിനത്തിലാണ് നഗരസഭയിലെ മുൻകാല ജനപ്രതിനിധികളെ നേരിൽ കണ്ട് ആദരം നൽകിയത്. പൊന്നാനി നഗരസഭയിലേയും പഴയ ഈഴുവത്തിരുത്തി പഞ്ചായത്തിലേയും ജനപ്രതിനിധികളായിരുന്ന നിലവിൽ വിശ്രമജീവിതം നയിക്കുന്നവരെയാണ് വീട്ടിൽ പോയി ആദരം നൽകിയത്.

നഗരസഭയുടെ മുൻ ചെയർപേഴ്സണും ഇമ്പിച്ചിബാവയുടെ പത്നിയുമായ ഫാത്തിമ ടീച്ചർ, മുൻ ചെയർമാനും എക്സ്.എം.പിയുമായ സി.ഹരിദാസ്, മുൻ ചെയർമാനായ ഹുസൈൻകോയ തങ്ങൾ, മുൻ കൗൺസിലർമാരായ എ.വി ചന്ദ്രശേഖരൻ, ടി.കെ നാരായണൻ, കോമളവല്ലി ടീച്ചർ, പഴയ ഈഴുവത്തിരുത്തി പഞ്ചായത്ത് മെമ്പർമാരായ കമലാമേനോൻ, കെ.കുമാരൻ തുടങ്ങിയവരെ ആദരിച്ചു. നഗരസഭാ ചെയർമാൻ ശിവദാസ് ആറ്റുപുറം, വൈസ് ചെയർപേഴ്സൺ ബിന്ദു സിദ്ധാത്ഥൻ, സ്ഥിരം സമിതി ചെയർമാൻമാരായ രജീഷ് ഊപ്പാല, ഷിനാസുദേശൻ കൗൺസിലർമാരായ കവിത, നസീമ തുടങ്ങിയവർ സംബന്ധിച്ചു.