ലോക്ഡൗണിൽ കൂടുതൽ ഇളവുകൾ; കടകളുടെ പ്രവർത്തന സമയം കൂട്ടി, ബാങ്കുകളിൽ എല്ലാ ദിവസവും ഇടപാടുകൾ
തിരുവനന്തപുരം: കോവിഡ് നിയന്ത്രണങ്ങളുടെ ഭാഗമായി പ്രഖ്യാപിച്ച ലോക്ഡൗണിൽ കൂടുതൽ ഇളവുകൾ നൽകാൻ തീരുമാനമായി. ബാങ്കുകൾ ഇനി എല്ലാ ദിവസവും പ്രവർത്തിക്കും. ഒന്നിടവിട്ട ദിവസങ്ങളിൽ മാത്രം ഇടപാട് അനുവദിച്ചിരുന്ന നിയന്ത്രണം എടുത്തുകളഞ്ഞു. ഇനി എല്ലാ ദിവസവും ഇടപാടുകാർക്ക് ബാങ്കിലെത്താനും ഇടപാടുകൾ നടത്താനും സാധിക്കും.
കടകളുടെ പ്രവർത്തനസമയം വർധിപ്പിച്ചു. ‘ഡി’ കാറ്റഗറി ഒഴികെയുള്ള സ്ഥലങ്ങളിൽ കടകൾക്ക് ഒന്നിടവിട്ട ദിവസങ്ങളിൽ രാത്രി എട്ടു മണി വരെ പ്രവർത്തിക്കാം. ട്രിപ്പ്ൾ ലോക്ഡൗൺ ഉള്ള ഡി കാറ്റഗറി സ്ഥലങ്ങളിൽ വെള്ളിയാഴ്ച രാത്രി 7 വരെ കടകൾക്ക് തുറന്ന് പ്രവർത്തിക്കാം. പോസിറ്റിവിറ്റി നിരക്ക് 15 ശതമാനത്തിന് മുകളിലുള്ള പ്രദേശങ്ങളാണ് ഡി കാറ്റഗറിയിലുള്ളത്.
അതേസമയം, ശനി, ഞായർ ദിവസങ്ങളിലുള്ള വരാന്ത്യ ലോക്ഡൗൺ തുടരും. ലോക്ഡൗൺ സംബന്ധിച്ച അവലോകന യോഗത്തിലാണ് ഇളവുകൾ സംബന്ധിച്ച തീരുമാനമെടുത്തത്.
#360malayalam #360malayalamlive #latestnews
