ഗുരുവായൂർ ദേവസ്വം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്കിയ പത്ത് കോടി തിരിച്ചു കൊടുക്കണമെന്ന് ഹൈക്കോടതി
കൊച്ചി: ഗുരുവായൂർ ദേവസ്വം ബോർഡ് മുഖ്യമന്ത്രിയുടെ ദുരിതാശ്വാസനിധിയിലേക്ക് നൽകിയ പത്ത് കോടി രൂപ ഉടൻ തിരിച്ചു നൽകാൻ ഹൈക്കോടതിയുടെ ഉത്തരവ്. ബി.ജെ.പി നേതാവ് എൻ. നാഗേഷ് അടക്കമുള്ളവർ നൽകിയ ഏതാനും ഹർജികളിലാണ് ഹൈക്കോടതിയുടെ ഉത്തരവ്. ദേവസ്വം പണം നൽകിയത് നിയമവിരുദ്ധമാണെന്ന് ഹൈക്കോടതി ഫുൾ ബഞ്ച് വിധിച്ചു. സ്വത്തുവകകൾ പരിപാലിക്കാൻ മാത്രമേ ട്രസ്റ്റി എന്ന നിലയിൽ ദേവസ്വം ബോർഡിന് അവകാശമുള്ളൂ. അത് മറ്റാർക്കും കൈമാറാൻ അധികാരമില്ല. ഗുരുവായൂർ ക്ഷേത്രവുമായി ബന്ധപ്പെട്ട എല്ലാ സ്വത്തുക്കളുടെയും അവകാശി ഗുരുവായൂരപ്പനാണെന്ന് ഹൈക്കോടതിയുടെ ഫുൾബഞ്ച് ഉത്തരവിൽ പരാമർശിക്കുന്നു. ദേവസ്വം നിയമത്തിൽ ഇത് വ്യക്തമാണെന്നും അതിന്റെ പരിധിയിൽ നിന്ന് മാത്രമേ ഭരണസമിതിക്ക് പ്രവർത്തിക്കാൻ കഴിയൂ എന്നും ഉത്തരവിൽ പറയുന്നു.
ദുരിതാശ്വാസനിധിയിലേക്ക് സംഭാവനയായി നൽകിയ തുക എങ്ങനെ തിരികെ ഈടാക്കണമെന്നത് ഹൈക്കോടതി ഡിവിഷൻ ബഞ്ച് തീരുമാനിക്കണമെന്നും ഉത്തരവ് പറയുന്നു. പ്രളയകാലത്തും മഹാമാരി കാലത്തുമായാണ് മുഖ്യമന്ത്രിയുടെ ദുരിതാശ്വാസനിധിയിലേക്ക് ദേവസ്വം ബോർഡ് 10 കോടി രൂപ സംഭാവന നൽകിയത്.
#360malayalam #360malayalamlive #latestnews