കോവിഡ് രോ​ഗിയുണ്ടെന്ന് വീടിനു മുന്നിൽ പോസ്റ്റർ പതിക്കരുത് : സുപ്രീം കോടതി

കോവിഡ് രോഗികൾ താമസിക്കുന്ന സ്ഥലത്തിനുപുറത്ത് പോസ്റ്റർ ഒട്ടിക്കുന്നതിനെതിരേ സുപ്രീംകോടതി. ഇത്തരം നടപടി രോഗികളോട് അയിത്തമുണ്ടാക്കാൻ കാരണമാകുമെന്ന് ജസ്റ്റിസ് അശോക് ഭൂഷൺ അധ്യക്ഷനായ ബെഞ്ച് ചൂണ്ടിക്കാട്ടി.

പോസ്റ്ററൊട്ടിക്കണമെന്ന് ചട്ടങ്ങളിലില്ലെന്നും മറ്റുള്ളവരുടെ സുരക്ഷയെ കരുതിയാണ് ചില സംസ്ഥാനങ്ങൾ അങ്ങനെ ചെയ്യുന്നതെന്നും കേന്ദ്രസർക്കാർ പറഞ്ഞു. കേന്ദ്രത്തിന്റെ മറുപടി ലഭിച്ചശേഷം വ്യാഴാഴ്ച കേസ് വീണ്ടും പരിഗണിക്കും.

കോവിഡ് രോഗികളുടെ വീടിനുപുറത്ത് പോസ്റ്ററുകൾ ഒട്ടിക്കുന്നത് ഒഴിവാക്കാൻ മാർഗരേഖ ഇറക്കുന്നത് പരിഗണിക്കണമെന്ന് നവംബർ അഞ്ചിനു സുപ്രീംകോടതി കേന്ദ്രത്തോട് ആവശ്യപ്പെട്ടിരുന്നു. കുഷ് കാൽറ എന്നയാൾ നൽകിയ പരാതിയിലാണ് നടപടി. കോവിഡ് രോഗികളുടെ വീടിനുപുറത്ത് പോസ്റ്ററൊട്ടിക്കുന്നത് നിർത്താൻ ഉദ്യോഗസ്ഥർക്ക് നിർദേശം നൽകിയതായി ഡൽഹിയിലെ എ.എ.പി. സർക്കാർ സുപ്രീംകോടതിയെ അറിയിച്ചിരുന്നു.