ബംഗളൂരുവിൽ 13 കോടി രൂപ വിലവരുന്ന മയക്കുമരുന്ന് ഫോട്ടോ ഫ്രെയിമിലും ആൽബത്തിലും ഒളിപ്പിച്ച നിലയിൽ പിടികൂടി

ബംഗളൂരു: ബംഗളൂരു വിമാനത്താവളത്തിൽ 13 കോടി രൂപ വിലവരുന്ന മയക്കുമരുന്ന്​ കടത്ത്​ പിടികൂടി. ഫോട്ടോ ഫ്രെയിമിലും ആൽബത്തിലും ഒളിപ്പിച്ച മയക്കുമരുന്ന്​ ബംഗളൂരു വിമാനത്താവളത്തിൽനിന്ന്​ ആസ്​ട്രേലിയ​യിലേക്ക്​ കടത്താനായിരുന്നു പദ്ധതി. എന്നാൽ സംശയം ​തോന്നിയതിനെ തുടർന്ന്​ സിംഗപ്പൂരിൽവെച്ച്​ പാർസൽ ബംഗളൂരു വിമാനത്താവളത്തിലേക്കുതന്നെ തിരിച്ചയക്കുകയുമായിരുന്നുവെന്ന്​ 'ദ ഹിന്ദു' റിപ്പോർട്ട്​ ​ചെയ്​തു. ചെന്നെയിലെ സ്വകാര്യകമ്പനിയുടെ പേരിലായിരുന്നു പാർസൽ.

അന്താരാഷ്​ട്ര വിമാനത്താവളത്തിൽ നടന്ന ഏറ്റവും വലിയ മയക്കുമരുന്ന്​ വേട്ടയാണിതെന്നും അന്താരാഷ്ട്ര വിപണിയിൽ ഇവക്ക്​ 13 കോടി രൂപ വിലവരുമെന്നും ഡയറക്​ടറേറ്റ്​ ഓഫ്റവന്യൂ ഇൻറലിജൻസ്​ പറഞ്ഞു.

സിംഗപ്പൂരിൽനിന്ന്​ തിരിച്ചയച്ച പാർസലിൽ ആസ്​ട്രേലിയയിലെ ബന്ധുവിന്​ അയച്ച ഫോട്ടോ, ആൽബം, വള, സ്വകാര്യ വസ്​തുക്കൾ തുടങ്ങിയവയെന്നായിരുന്നു വിവരം. എന്നാൽ കൂടുതൽ പരിശോധനയിൽ ഫോട്ടോ ഫ്രെയിമിനകത്തും മറ്റുമായി 13കോടി രൂപയുടെ മയക്കുമരുന്ന്​ ഒളിപ്പിച്ചുവെച്ചതായി കണ്ടെത്തി.