തീരദേശത്ത് കാറ്റും കടലേറ്റവും; പൊന്നാനിയിൽ വീട് തകർന്നു

പൊന്നാനി: തീരദേശമേഖലയിൽ തിങ്കളാഴ്ച രാവിലെ ശക്തമായ കാറ്റും കടലേറ്റവും. അഴീക്കൽ പ്രദേശത്ത് ഒരു വീടിന്റെ മുൻഭാഗം ഭാഗികമായി തകർന്നു. കടലേറ്റഭീഷണി നേരിടുകയാണ് ഈ ഭാഗത്ത് ചില വീടുകൾ. പല വീടുകളിലേക്കും വെള്ളം കയറിയിട്ടുണ്ട്

കൊലാജിയാരകത്ത് കുഞ്ഞൻബാവയുടെ വീടിന്റെ മുൻഭാഗമാണ് തകർന്നത്. കാലാവസ്ഥാ മുന്നറിയിപ്പ് കണക്കിലെടുത്ത് വള്ളങ്ങളും ബോട്ടുകളും കടലിലിറങ്ങിയിട്ടില്ല. കഴിഞ്ഞദിവസങ്ങളിലുണ്ടായ ശക്തമായ മഴയിൽ തീരദേശത്ത് പലയിടത്തും വെള്ളക്കെട്ടുണ്ടായിട്ടുണ്ട്. മഴവെള്ളം കടലിലേക്ക് ഒഴുക്കിവിടാൻ താത്‌കാലികസംവിധാനങ്ങൾ ഒരുക്കിയിരുന്നെങ്കിലും ഇത്തവണ അതുണ്ടായില്ലെന്ന് നാട്ടുകാർ പരാതിപ്പെട്ടു. തകർന്ന കുഞ്ഞൻബാവയുടെ വീടിന് എത്രയുംവേഗം നഷ്ടപരിഹാരം നൽകണമെന്ന് വാർഡ് കൗൺസിലർ പറമ്പിൽ അതീഖ് അധികൃതരോടാവശ്യപ്പെട്ടു.