ചെറവല്ലൂർ ബണ്ട് റോഡ് നിർമാണത്തിനായി മണ്ണ് പരിശോധനയ്ക്കുള്ള ഭരണാനുമതിയും സാങ്കേതിക അനുമതിയും തയ്യാറായി

പെരുമ്പടപ്പ് പഞ്ചായത്തിൽ ഉൾപ്പെടുന്നതും പൊന്നാനി കോൾ മേഖലയിൽ ഒറ്റപ്പെട്ടു കിടക്കുന്ന പ്രദേശവുമായ ചെറവല്ലൂർ ബണ്ട് റോഡ് നിർമാണത്തിനായി മണ്ണ് പരിശോധനയ്ക്കുള്ള ഭരണാനുമതിയും സാങ്കേതിക അനുമതിയും തയ്യാറായി. തുരുത്തുമ്മൽ , ആമയം , ചെറവല്ലൂർ തുടങ്ങിയ മൂന്നു തുരുത്തുകളും പെരുമ്പടപ്പ് പഞ്ചായത്തിലെ രണ്ടു വാർഡുകളും ഉൾപ്പെടുന്ന ഈ പ്രദേശം ബിയ്യം കായലിനപ്പുറത്തുള്ള  ചെറവല്ലൂർ ഭാഗത്താണ്.

ഈ പ്രദേശത്തുള്ളവർക്ക്  പെരുമ്പടപ്പ് ഗ്രാമപഞ്ചായത്ത് ഓഫീസിലോ പെരുമ്പടപ്പ് ബ്ലോക്ക് പഞ്ചായത്തിന് കീഴിലുള്ള ഓഫീസുകളിലേക്കോ എത്തി ചേരണമെങ്കിൽ  ഒന്നുകിൽ തൃശൂർ ജില്ലയിലെ എ.ഇ.ഒ  ഓഫീസ് വഴിയോ അല്ലെങ്കിൽ നന്നംമുക്ക് പഞ്ചായത്ത് , വെളിയങ്കോട് പഞ്ചായത്ത് എന്നിവിടങ്ങളിലൂടെ ചുറ്റി വളഞ്ഞു വരേണ്ട അവസ്ഥയാണ് നിലനിൽക്കുന്നത് .

നിലവിലെ ബണ്ടു റോഡ് ബലപ്പെടുത്തി വീതി കൂട്ടി വലിയ റോഡായി പദ്ധതി കൊണ്ടുവന്നതെങ്കിലും കാലാവസ്ഥയിലുണ്ടാകുന്ന ദ്രുതഗതിയിലുള്ള മാറ്റവും പ്രളയമടക്കമുള്ള പ്രകൃതി ദുരന്തങ്ങളും അതിജീവിക്കാൻ റോഡായി ചെറവല്ലൂർ ബണ്ട് റോഡിനെ മാറ്റി തീർക്കേണ്ടതുണ്ട് . ഇതിനൊരു പരിഹാരമായാണ് ചെറവല്ലൂർ ബണ്ട് റോഡിന് 2019-20 ബജറ്റിൽ 5 കോടി രൂപ അനുവദിച്ചത് .രണ്ടായിരത്തിലധികം കുടുംബങ്ങളുടെ യാത്രാ പ്രശ്നത്തിനാണ് ഇതോടെ ശാശ്വതമായ പരിഹാരമാകുന്നത് .

പൊന്നാനി എം എൽ എ നന്ദകുമാർ പൊതുമരാമത്ത്  വകുപ്പ് മന്ത്രിയുമായി ചർച്ച നടത്തിയതിന്റെ അടിസ്ഥാനത്തിൽ 03.11.2021 ന് നിർദിഷ്ട പദ്ധതി നടപ്പിലാക്കുന്നതിന് മുന്നോടിയായി നടത്തേണ്ട "സോയിൽ ഇൻവസ്റ്റിഗേഷൻ" വർക്കിന്‌ 6,90,000/- രൂപക്കുള്ള ഭരണാനുമതി പി.ഡബ്ലി.യു.ഡി ചീഫ് എഞ്ചിനീയർ (ഡിസൈൻ) നൽകിയിരുന്നു .  ഈ പ്രവർത്തിക്കുള്ള "സാങ്കേതിക അനുമതി"05.11.2021 ന് പി.ഡബ്ലി.യു.ഡി എക്സിക്യൂട്ടീവ് എഞ്ചിനീയർ(ഡിസൈൻ) നൽകിയിരുന്നു . ഒരു  മാസത്തിനുള്ളിൽ മണ്ണ് പരിശോധന ആരംഭിക്കുമെന്ന്  പൊതുമരാമത്ത് വകുപ്പ് അറിയിച്ചിട്ടുണ്ട്. മൊത്തം പദ്ധതി ചെലവ് 5 കോടി രൂപയാണ് .