പി.എം.എ.വൈ - ലൈഫ് പദ്ധതി പ്രകാരം നിർമ്മിച്ച വീടുകളുടെ പൂർത്തീകരണ പ്രഖ്യാപനം നടത്തി

പൊന്നാനി നഗരസഭയിൽ പി.എം.എ.വൈ - ലൈഫ് പദ്ധതി പ്രകാരം നിർമ്മിച്ച വീടുകളുടെ  പൂർത്തീകരണ പ്രഖ്യാപന ചടങ്ങ് സംഘടിപ്പിച്ചു.  സംസ്ഥാന സർക്കാരിൻ്റെ 100 ദിന കർമപരിപാടിയുടെ ഭാഗമായാണ് ചടങ്ങ് സംഘടിപ്പിച്ചത്. ലൈഫ്മിഷൻ വഴി സംസ്ഥാന തലത്തിൽ നിർമാണം പൂർത്തികരിച്ച 10000 വീടുകളുടെ പൂർത്തീകരണ  പ്രഖ്യാപനം ഓൺലൈൻ ആയി  മുഖ്യമന്ത്രി പിണറായി വിജയൻ  നിർവ്വഹിച്ചു. അതിൻ്റെ ഭാഗമായാണ്  പൊന്നാനി നഗരസഭയിലും പൂർത്തീകരണ പ്രഖ്യാന ചടങ്ങ് സംഘടിപ്പിച്ചത്. പൊന്നാനിയിൽ പി.എം.എ.ഐ-ലൈഫ് പദ്ധതി പ്രകാരം ഇതുവരെ 1026 ഭവനങ്ങൾ പൂർത്തീകരിച്ചു. 6 ഡി.പി.ആറുകളിലായി മൊത്തം 1320 വീടുകളാണ് പദ്ധതിപ്രകാരം പൊന്നാനിയിൽ ഉയരുന്നത്. ബാക്കിയുള്ള 294 വീടുകളുടെ നിർമാണ പ്രവർത്തങ്ങൾ വിവിധ ഘട്ടങ്ങളിലാണ്. ഇത്തരം വീടുകളുടെ പണി വേഗത്തിലാക്കാനുള്ള ശ്രമത്തിലാണ് പൊന്നാനി നഗരസഭ.

പരിപാടിയുടെ നഗരസഭാ തല ഉദ്ഘാടനം ചെയർമാൻ ശിവദാസ് ആറ്റുപുറം നിർവ്വഹിച്ചു. ക്ഷേമകാര്യ സ്ഥിരംസമിതി അധ്യക്ഷൻ രജീഷ് ഊപ്പാല അധ്യക്ഷത വഹിച്ച ചടങ്ങിൽ വൈസ് ചെയർപേഴ്സൺ ബിന്ദു സിദ്ധാർത്ഥൻ, സ്ഥിരം സമിതി ചെയർപേഴ്സൺമാരായ എം.ആബിദ, ഷീനാസുദേശേൻ, നഗരസഭാ എഞ്ചിനീയർ സുജിത്ത് ഗോപിനാഥ്, മെമ്പർ സെക്രട്ടറി ജസീന മജീദ് തുടങ്ങിയവർ സംബന്ധിച്ചു.