കേരളത്തില് ഇപ്പോള് പെയ്യുന്ന മഴ പ്രളയത്തിന് കാരണമാകുമോ? എന്താണ്ഓ ഗസ്റ്റില് മഴ കൂടാന് കാരണം? കാലവര്ഷവും ന്യൂനമര്ദങ്ങളും തമ്മിലുള്ള ബന്ധം തുടങ്ങിയവയെ കുറിച്ച് കാലാവസ്ഥാ വിദഗ്ധരും കൊച്ചി ശാസ്ത്ര സാങ്കേതിക സര്വകലാശാലയിലെ റഡാര് കേന്ദ്രം അസോഷ്യേറ്റ് ഡയരക്ടര് ഡോ.എസ്. അഭിലാഷ്, അഡ്വന്സ്ഡ് സെന്റര് ഫോര് അറ്റ്മോസ്ഫിയറിക് റഡാര് റിസര്ച്ചിലെ ഡോ. പി. വിജയകുമാര് എന്നിവര് എഴുതിയത്.
ഡോ.എസ് അഭിലാഷ്, ഡോ.പി. വിജയകുമാര്
എന്താണ് കാലവര്ഷം?
വര്ഷംതോറും ഭൂമിയുടെ ഉത്തരഗോളത്തില് നേരിട്ട് പതിക്കുന്ന സൂര്യപ്രകാശം (വേനലില്) ഇന്ത്യന് ഉപഭൂഖണ്ഡത്തിന്റെ വടക്കായി യൂറോപ്യന് വന്കര ചൂടുപിടിക്കുകയും തല്ഫലമായി വലിയ ഒരു ഭൂപ്രദേശത്തിന്റെ ഉപരിതലത്തില് ന്യൂനമര്ദ മേഖല രൂപപ്പെടുകയും ചെയ്യുന്നു. അതേസമയം, ദക്ഷിണാര്ധ ഗോളത്തില് ഇന്ത്യന് മഹാസമുദ്രത്തിലെ അന്തരീക്ഷ മര്ദ്ദം കൂടിയിരിക്കുന്നതിനാല് ആ ഭാഗത്തു നിന്നും മേല്പറഞ്ഞ ന്യൂനമര്ദമേഖലയിലേക്ക് ഏറെക്കുറെ തുടര്ച്ചയായി വീശുന്ന കാറ്റാണ് തെക്കുപടിഞ്ഞാറന് മണ്സൂണ് അഥവാ കാലവര്ഷം എന്നു അറിയിപ്പെടുന്നത്. അറബിക്കടല്, ബംഗാള് ഉള്ക്കടല് എന്നീ ഉഷ്ണജലത്തിനു മുകളിലൂടെയുള്ള കാറ്റ് ഈര്പ്പമുള്ളതാകുകയും ഈ കാറ്റ് ഇന്ത്യയില് മഴ നല്കുകയും ചെയ്യുന്നു.
എന്നാല് രാജ്യത്ത് മഴയുടെ സ്ഥലകാല വിതരണത്തില് വളരെയേറെ വ്യത്യാസങ്ങളുണ്ട്. കേരളത്തില് ജൂണ് 1 ന് കാലവര്ഷം തുടങ്ങി സെപ്തംബര് 30 വരെ നീണ്ടു നി്ല്ക്കുമ്പോള് ഉത്തരേന്ത്യയില് മഴ ലഭിക്കുന്നത് ജൂലൈ, ഓഗസ്റ്റ് മാസങ്ങളിലാണ്. മഴയുടെ ലഭ്യതയുടെ തോതും വ്യത്യസ്തമാണ്. കേരളം ഉള്പ്പെടുന്ന പശ്ചിമഘട്ടത്തിന്റെ പടിഞ്ഞാറും വടക്കുകിഴക്കന് സംസ്ഥാനങ്ങളിലുമാണ് മണ്സൂണ് കൂടുതലായി പെയ്യുന്നത്. കാലവര്ഷത്തിന് സജീവ, നിര്ജീവ അവസ്ഥകളുണ്ട്. നിര്ജീവ അവസ്ഥയിലാണ് നമുക്ക് മണ്സൂണ് സീസണിലും വെയില് ലഭിക്കുന്നത്.
2020 ഓഗസ്റ്റിലെ മഴ എങ്ങനെ?
ഈ മാസത്തെ മണ്സൂണ് സജീവമാണ്. നിരവധി ഘടകങ്ങള് ഒത്തുവരുമ്പോഴാണ് മണ്സൂണ് സജീവമാകുന്നത്. മഴയുടെ സ്വഭവാവം അളവ് എന്നിവ പലപ്പോഴും പ്രാദേശികമായി വ്യത്യാസപ്പെട്ടിരിക്കും. കൃത്യമായ പ്രവചനങ്ങള്ക്ക് പിടികൊടുക്കാത്ത ഒന്നാണ് ഇന്നും മണ്സൂണ്. എന്നാല് ഇക്കാലത്ത് അന്തരീക്ഷ ശാസ്ത്രജ്ഞര് ആശ്രയിക്കുന്ന കംപ്യൂട്ടര് ഗണിതമാതൃകകള് മണ്സൂണ് പ്രവചനത്തിന്റെ കൃത്യത വലിയതോതില് വര്ധിപ്പിച്ചിട്ടുണ്ട്.
കാലാവസ്ഥാ മാറ്റത്തിന് കാരണം?
ആഗോളതാപനത്തിന്റെ പശ്ചാത്തലത്തില് ലോകമെമ്പാടും കാലാവസ്ഥയില് വലിയ മാറ്റങ്ങള് ദൃശ്യമാകുന്ന ഈ കാലഘട്ടത്തില് മണ്സൂണ് മഴയുടെ വിതരണത്തിലും മഴയുടെ തീവ്രതയിലും വര്ഷാ വര്ഷം ലഭിക്കുന്ന മഴയുടെ ലഭ്യതയിലും വലിയ മാറ്റങ്ങള് പ്രകടമാണ്. ദീര്ഘകാല ശരാശരിയുടെ അടിസ്ഥാനത്തില് ഒരു മണ്സൂണ് സീസണില് ഇന്ത്യന് ഭൂപ്രദേശം മുഴുവന് കണക്കിലെടുത്താല് ലഭിക്കുന്നത് ഏകദേശം 90 സെ.മി മഴയാണ്. വാര്ഷിക മഴ ലഭ്യതയില് 10 മുതല് 20 ശതമാനം വരെ ചാഞ്ചല്യം പ്രകടമാണെങ്കിലും പൊതുവെ മണ്സൂണിനെ സ്ഥിരതയാര്ന്ന കാലാവസ്ഥാ പ്രതിഭാസമായിട്ടാണ് കരുതിയിരുന്നത്. ജൂണ് ആദ്യംമുതല് സെപ്റ്റംബര് അവസാനം വരെ കേരളത്തില് ലഭിക്കുന്ന ശരാശരി മഴയുടെ അളവ് 200 സെ.മിയിലും കൂടുതലാണ്.
കഴിഞ്ഞ 10 വര്ഷം കേരളത്തിലെ മഴ
എന്നാല് കഴിഞ്ഞ ഒരു ദശകത്തില് കേരളത്തില് ലഭിച്ച മണ്സൂണ് മഴയുടെ കണക്ക് പരിശോധിച്ചാല്, പകുതിയില് അധികം വര്ഷങ്ങളിലും മണ്സൂണ് മഴയില് ശരാശരിയില് നിന്നും 20 ശതമാനത്തില് അധികം വ്യതിയാനം ഉണ്ട്. മണ്സൂണ് സമീപ കാലഘട്ടത്തില് കൂടുതല് അസ്ഥിരമാണെന്നാണ് ഇതു തെളിയിക്കുന്നത്. ഇതില് 2 വര്ഷങ്ങളില് (2013, 2018) ശരാശരിയില് നിന്നും 20 ശതമാനത്തില് അധിക മഴ ലഭിച്ചപ്പോള് 3 വര്ഷങ്ങളില് (2012 , 2015 , 2016) ശരാശരിയില് നിന്നും 20 ശതമാനത്തില് കുറവുമഴയാണ് ലഭിച്ചത്. മറ്റൊരു തരത്തില് പറഞ്ഞാല് ഒരു ദശകത്തില് അതിവര്ഷമോ അനാവൃഷ്ടി വര്ഷമോ ഉണ്ടാകുവാനുള്ള സാധ്യത 50 ശതമാനത്തില് അധികമാണെന്ന് കാണാം.
ഓഗസ്റ്റ്-സെപ്റ്റംബറില് മഴ കൂടുന്നു
മറ്റൊരു ശ്രദ്ധേയമായ മാറ്റം കേരളത്തില് ജൂണ്-ജൂലൈ മാസങ്ങളില് മഴ കുറയുന്നതും ഓഗസ്റ്റ്-സെപ്റ്റംബര് മാസങ്ങളില് മഴ കൂടുന്നതുമാണ്. ഇതോടൊപ്പം മണ്സൂണിന്റെ ആരംഭ സമയത്ത് ജൂണ് മാസത്തില് അറബിക്കടലില് ചുഴലിക്കാറ്റുകള് പതിവാകുന്നതും കേരളത്തിലെ മണ്സൂണ് കാലത്തിന്റെ തുടക്കത്തെ പ്രതികൂലമായി ബാധിക്കാറുണ്ട്. ആഗോള താപനത്തിന്റെ ഫലമായി കരയും കടലും ചൂടുപിടിച്ചു ബാഷ്പീകരണ തോത് വര്ധിക്കുന്നതിനോടൊപ്പം അന്തരീക്ഷവും ചൂടുപിടിക്കുന്നത് കൊണ്ട് അന്തരീക്ഷത്തിനു കൂടുതല് നീരാവിയെ ഉള്ക്കൊള്ളുവാന് സാധിക്കുകയും ഇതു പലപ്പോഴും അതി തീവ്ര മഴയ്ക്ക് കാരണമാകാറുമുണ്ട്. ഇതുകാരണം മണ്സൂണിന്റെ ഭാഗമായ തെക്കുപടിഞ്ഞാറന് കാറ്റ് ശക്തിപ്രാപിക്കുന്ന അവസരങ്ങളില് കേരളത്തില് ചുരുങ്ങിയ കാലയളവില് ലഭിക്കുന്ന അതിതീവ്ര മഴ വര്ധിക്കുന്നതായി കാണുവാന് സാധിക്കും. കാലാവസ്ഥാ വ്യതിയാനത്തിന്റെ ഭാഗമായി മിതമായ മഴ ദിനങ്ങള് കുറയുകയും അതിതീവ്ര മഴ ദിനങ്ങള് കൂടുകയും ചെയുന്നു. മലനാടും ഇടനാടും തീരപ്രദേശവും ഉള്പ്പെടുന്ന സവിശേഷമായ ഭൂപ്രകൃതിയുള്ള കേരളത്തെ പോലെയുള്ള സ്ഥലങ്ങളില് ഇത്തരം മാറ്റങ്ങള് പ്രളയത്തിനും വരള്ച്ചക്കും ഒരുപോലെ ആക്കം കൂട്ടാറുണ്ട്. കഴിഞ്ഞ ദശകത്തില് കേരളത്തില് ലഭിച്ച മണ്സൂണ് മഴയുടെ തീവ്രത പരിശോധിച്ചാല് ഇതു വ്യക്തമാകും. മണ്സൂണ് മഴയുടെ വിതരണത്തിലും തീവ്രതയിലും കാണുവാന് സാധിക്കുന്ന മാറ്റങ്ങള്ക്കൊപ്പം മഴ മേഘങ്ങളുടെ ഘടനയില് സംഭവിച്ച മാറ്റങ്ങള് എടുത്തു പറയേണ്ടതാണ്.
എന്തുകൊണ്ട് കാലവര്ഷത്തില് ഇടിവെട്ടിപെയ്യുന്നു
സാധാരണയായി കാലവര്ഷ സമയത്തു കാണപ്പെടുന്നത് 'നിമ്പോ-സ്ട്രാറ്റസ് ' വിഭാഗത്തില് പെടുന്ന ഉയരം കുറഞ്ഞ മേഘങ്ങളാണ്. ഇത്തരം മേഘങ്ങളില് ഹിമകണങ്ങളുടെ സാന്നിധ്യം കുറവായതിനാല് മണ്സൂണ് സമയത്ത്് ഇടിയും മിന്നലും ഉണ്ടാകുന്നത് വിരളമായിരുന്നു. എന്നാല് അടുത്ത കാലത്തായി മണ്സൂണ് സമയത്തും അന്തരീക്ഷത്തില് 12-15 സെ.മി വരെ ഉയരത്തില് എത്തുന്ന ഹിമകണങ്ങളുടെ സാന്നിധ്യമുള്ള ഇടിമിന്നല് മേഘങ്ങളായ കൂമ്പാര ('ക്യൂമുലോനിംബസ് ') മേഘങ്ങള് പതിവാകുന്നത് ആഗോളതാപനത്തിന്റിന്റെ ഫലമായിട്ടാണെന്നാണ് പൊതുവെ വിലയിരുത്തുന്നത്. ഇത്തരം മേഘങ്ങളുടെ മറ്റൊരു സവിശേഷത ചുരുങ്ങിയ കാലയളവില് അതിതീവ്ര മഴ പെയ്യിക്കാന് സാധിക്കും എന്നുള്ളതാണ്. കേരളത്തില് അതിതീവ്രമായി മഴ ലഭിച്ച 2018 ലും 2019 ലും ഇത്തരം കൂമ്പാരമേഘങ്ങളുടെ സാന്നിധ്യം ദൃശ്യമായിരുന്നു.
പ്രളയസാധ്യത വര്ധിപ്പിക്കുന്നത് എന്ത്?
മണ്സൂണ് മഴയില് വാര്ഷിക വ്യതിയാനത്തോടൊപ്പം പ്രതിദിന വ്യതിയാനവും എടുത്തു പറയേണ്ടതാണ്. അതായത് മണ്സൂണ് സമയത്തു എല്ലാ ദിവസവും ഒരേപോലെ മഴ ലഭിക്കണമെന്നില്ല. പടിഞ്ഞാറന് തീരത്തു കാണുന്ന ന്യുനമര്ദ്ദ പാത്തിയും (Offshore trough), ബംഗാള് ഉള്ക്കടല് മുതല് പാകിസ്താന് വരെ നീണ്ടു നില്ക്കുന്ന മണ്സൂണ് മഴ പാത്തിയുമാണ് (monsoon trough) ദൈനം-ദിന മഴയുടെ ഏറ്റക്കുറച്ചിലുകള് നിര്ണയിക്കുന്നത് . ചില അവസരങ്ങളില് മണ്സൂണ് മഴ പാത്തിയില് രൂപം കൊള്ളുന്ന ചെറിയ ന്യുന മര്ദ്ദങ്ങളും (monsoon lows), തീവ്ര ന്യുനമര്ദ്ദങ്ങളുമാണ് (monsoon depressions) ഇന്ത്യന് ഉപ-ഭൂഖണ്ഡത്തിലെ മണ്സൂണ് മഴയുടെ സജീവ കാലഘട്ടം (active period) നിര്ണയിക്കുന്ന പ്രധാന ഘടകം. ശാന്ത സമുദ്രത്തില് ഉണ്ടാകുന്ന ചുഴലിക്കാറ്റുകളും ഇന്ത്യയുടെ പശ്ചിമ തീരത്തെ മഴയുടെ തീവ്രതയെ സ്വാധീനിക്കാറുണ്ട്. കാലാവസ്ഥാ വ്യതിയാനത്തിന്റെ ഭാഗമായി സജീവ കാലഘട്ടത്തില് ലഭിക്കുന്ന മഴയുടെ തീവ്രത വര്ധിക്കുന്നുണ്ടെക്കിലും മഴ ദിനങ്ങള് കുറയുന്നതും നിര്ജീവ കാലഘട്ടത്തിലെ (break period) ദിനങ്ങള് കൂടുന്നതായും കാണുന്നുണ്ട്. ഇത് സജീവ കാലഘട്ടത്തില് പ്രളയ സാധ്യത വര്ധിപ്പിക്കുകയും കേരളം പോലെ വലിയ ചെരിവുള്ള പ്രദേശങ്ങളില് പെയ്തു വെള്ളം വേഗം കടലില് എത്തിച്ചേരുന്നതിനാല് മഴക്കാലം കഴിയുമ്പോള് വരള്ച്ചാ ഭീഷണിയെയും നേരിടേണ്ടതായി വരുന്നു. ചുരുക്കി പറഞ്ഞാല് ആഗോളതാപനത്തിന്റെ ഫലമായി മണ്സൂണ് മഴയില് വരുന്ന മാറ്റങ്ങള് ഒരേ സ്ഥലത്തു ഒരു സീസണലില് തന്നെ പ്രളയവും വരള്ച്ചയും ഉണ്ടാകുവാന് കാരണമായേക്കാം.
2020 ല് പ്രളയമുണ്ടാകുമോ ?
കേരളത്തില് കഴിഞ്ഞ രണ്ടു വര്ഷങ്ങളിലും ഓഗസ്റ്റില് തുടര്ച്ചയായി പ്രളയമുണ്ടായതിനാല് ഈ വര്ഷവും പ്രളയം ഉണ്ടാകുവാന് സാധ്യത ഉണ്ടെന്ന് പല കോണുകളില് നിന്ന്നും ആശങ്കകള് വരുന്നുണ്ട്. കഴിഞ്ഞ രണ്ടു വര്ഷവും ഓഗസ്റ്റില് പ്രളയമുണ്ടായ സാഹചര്യവും അടുത്ത രണ്ടാഴ്ചകളിലേക്കുള്ള പ്രവചനങ്ങളും താരതമ്യം ചെയ്യേണ്ടത് അത്യാവശ്യം ആണ്. 2018ല് ജൂണ് 1 മുതല് ജൂലൈ 31 വരെ കേരളത്തില് ലഭിച്ചത് 18 % കൂടുതല് മഴ ആയിരുന്നെങ്കില് 2019 ല് ഇതേ കാലയളവില് ലഭിച്ചത് 32 % കുറച്ചു മഴ ആയിരുന്നു. 2018 ല് കേരളത്തിലെ മുഴുവന് ഡാമുകളും സംഭരണ ശേഷിയില് എത്തിയിരുന്നു എന്നതും പ്രസക്തമാണ്. പ്രളയമുണ്ടായ അഞ്ചു ദിവസത്തെ കണക്കു മാത്രം പരിശോധിച്ചാല് 2018 ഓഗസ്റ്റ് 14 മുതല് 18 വരെ കേരളത്തില് ലഭിച്ചത് 431 എം.എം മഴ ആയിരുന്നെങ്കില് 2019 ഓഗസ്റ്റ് 7 മുതല് 11 വരെ ലഭിച്ചത് 477 എം.എം മഴ ആയിരുന്നു. ഇതു യഥാക്രമം ഈ സമയത്തു ലഭിക്കേണ്ടിയിരുന്ന ശരാശരി മഴയെക്കാള് 490 %, 511 % കൂടുതല് ആയിരുന്നു. 2018 പ്രളയകാലത്തു ലഭിച്ച മഴയേക്കാള് കൂടുതല് മഴ 2019 പ്രളയ കാലത്തു ലഭിച്ചു എന്ന് കാണുവാന് സാധിക്കും. എന്നാല് 2018 ല് കേരളം മുഴുവന് പ്രളയക്കെടുതി ഉണ്ടായപ്പോള്, 2019 ല് വടക്കന് ജില്ലകളിലും ചില കിഴക്കന് മലയോര പ്രദേശങ്ങളിലുമാണ് കൂടുതല് വെള്ളപ്പൊക്കവും ഉരുള്പൊട്ടലുകളും അനുഭവപ്പെട്ടത്. ഇതില്നിന്നും 2018 ലെ പ്രളയവും സാഹചര്യങ്ങളും 2019 ല് നിന്നും വ്യത്യസ്തമായിരുന്നു എന്ന് കാണുവാന് സാധിക്കും. 2019 ല് കേരളത്തിന് മുകളില് കൂടുതല് ഉയരത്തിലുള്ള കൂമ്പരമേഘങ്ങളില് നിന്നുള്ള മേഘവിസ്ഫോടനത്തിനു സമാനമായ മഴയായിരുന്നു ലഭിച്ചത് എന്നും വ്യക്തമാണ്.
2018, 2019 അന്തരീക്ഷസ്ഥിതിയിലെ സമാനതകള്
2018 ലെയും 2019 ലെയും പ്രളയസമയത്തു അന്തരീക്ഷസ്ഥിതിയില് ചില സമാനതകളും ഉണ്ടായിരുന്നു എന്നതും എടുത്തുപറയേണ്ടതാണ്. ബംഗാള് ഉള്ക്കടല് മുതല് പാകിസ്താന് വരെ നീണ്ടു നില്ക്കുന്ന ന്യുനമര്ദ പാത്തി ഈ രണ്ടു വര്ഷങ്ങളിലും സജീവമായിരുന്നു എന്നതാണ്. അതോടൊപ്പം ബംഗാള് ഉള്ക്കടലില് ന്യുനമര്ദ്ദവും പടിഞ്ഞാറന് ശാന്തസമുദ്രത്തില് ടൈഫൂണുകളുടെ സാന്നിധ്യവും ഉണ്ടായിരുന്നു. ഈ രണ്ടു ഘടകങ്ങളും പടിഞ്ഞാറന് തീരത്തു മണ്സൂണ് കാറ്റിനെ ശക്തിപ്പെടുത്തുന്നതിനും സഹായകമായി. ഇന്ത്യയിലെ മണ്സൂണ് മഴയെ സ്വാധീനിക്കുന്ന മറ്റൊരു സമുദ്ര ഘടകമായ ഇന്ത്യന് ഓഷ്യന് േൈഡപോള് (Indian Ocean Dipole : IOD) 2018 ഓഗസ്റ്റില് ന്യുട്രല് ഫേസ് ആയിരുന്നെങ്കില് 2019 ഓഗസ്റ്റില് അത് പോസിറ്റീവ് ഫേസ് ആയിരുന്നു. ഇന്ത്യയിലെ മണ്സൂണ് മഴയെ സ്വാധീനിക്കുന്ന മറ്റൊരു പ്രധാന ഘടകമായ എല്നിനോ ( കിഴക്കന് ഉഷ്ണമേഖലാ ശാന്ത സമുദ്രം ചൂടാകുന്ന അവസ്ഥ) 2018 ല് ന്യൂട്രല് ഫേസ് ആയിരുന്നെങ്കില്, 2019 ല് മധ്യ ഉഷ്ണമേഖലാ ശാന്ത സമുദ്രം ചൂടാകുന്ന അവസ്ഥയായ ചെറിയ എല്നിനോ മോഡോക്കി (Modokki) നിലനിന്നിരുന്നു. എന്നാല് ഈ സീസണില് സമുദ്രത്തിലെ സ്ഥിതി കേരളത്തില് വലിയ പ്രളയം സൃഷ്ടിക്കാന് മാത്രമുള്ള മഴ പെയ്യിക്കുന്നതിന് അനുകൂലമായി കാണപ്പെടുന്നില്ല.
ഈമാസത്തെ അന്തരീക്ഷസ്ഥിതി
ഇനിയും 2020 ഓഗസ്റ്റ് ആദ്യ ആഴ്ചകളില് കാലാവസ്ഥാ പ്രവചന മാതൃകകള് നല്കുന്ന സൂചനകള് എന്തെല്ലാമാണെന്ന് നോക്കാം. പ്രവചന മാതൃകളും കേന്ദ്ര കാലാവസ്ഥാ വകുപ്പന്റെ പ്രവചനങ്ങളും സൂചിപ്പിക്കുന്നത് ചൈന കടലില് ഇപ്പോള് നിലവിലുള്ള sinlaku ടൈഫൂണിന്റെ അവശേഷിപ്പുകള് ഇന്നലെ ബംഗാള് ഉള്ക്കടലില് എത്തി ന്യുനമര്ദ്ദമായി രൂപപ്പെടുകയും അതുവഴി പടിഞ്ഞാറന് കാറ്റിന്റെ ശക്തി വര്ധിക്കുകയും മണ്സൂണ് സജീവ കാലഘട്ടത്തിലേക്ക് നീങ്ങുകയും ഇന്ത്യയുടെ പടിഞ്ഞാറന് തീരത്തും മധ്യ ഇന്ത്യയിലും ഒന്നോ രണ്ടോ ദിവസങ്ങളില് ശക്തമായതും ചില സ്ഥലങ്ങളില് അതിതീവ്ര മഴയും ലഭിക്കാന് കാരണമായേക്കാം. എന്നാല് 2018, 2019 കാലഘട്ടത്തില് നിന്ന് വ്യത്യസ്തമായി അന്താരാഷ്ട്ര കാലാവസ്ഥാ ഏജന്സികളുടെ പ്രവചന പ്രകാരം പടിഞ്ഞാറന് ശാന്ത സമുദ്രത്തില് haugpit എന്ന ടൈഫൂണിന്റെ സാന്നിധ്യം കുടി പ്രവചിക്കുന്നതിനാല് ഓഗസ്റ്റ് 4 മുതല് 10 വരെ 2018ലും 2019ലും നിലനിന്നിരുന്നത് പോലുള്ള അന്തരീക്ഷസ്ഥിതിയാണ് പ്രതീക്ഷിക്കുന്നത്. എന്നാല് IOD ഈ അവസരത്തില് നെഗറ്റീവ് ദശയിലും ശാന്ത സമുദ്രം എല്നിനോയ്ക്ക് വിപരീത ദിശയിലുള്ള ലാനിനാ ഘട്ടത്തിലേക്ക് കടക്കുന്നതിനാലും സാമുദ്രിക ഘടകങ്ങള് 2018 ല് നിന്നും 2019 ല് നിന്നും വിഭിന്നമാണ്. കൊച്ചി ശാസ്ത്ര സാങ്കേതിക സര്വകലാശാലയുടെ അന്തരീക്ഷ റഡാര് ഉപയോഗിച്ച് നടത്തുന്ന നിരീക്ഷണങ്ങള് പ്രകാരം ഓഗസ്റ്റ്് ഒന്നു മുതല് മണ്സൂണ് ജെറ്റിന്റെ വേഗം ദിനം പ്രതി വര്ധിച്ചു വരുന്നതായാണ് മനസിലാവുന്നത്. ഓഗസ്റ്റ 5-6 തിയതികളിലായി ജെറ്റിന്റെ വേഗത പരമാവധിയില് എത്തുകയും അതിനോടനുബന്ധിച്ച് ഒന്ന് രണ്ടു ദിവസങ്ങളില് 10 മുതല് 20 രാ വരെ മഴയും ഒരു ആഴചയില് 30 മുതല് 40 രാ വരെ മഴയും ലഭിക്കുവാനുള്ള സാഹചര്യമാണ് ഇപ്പോള് നിലവിലുള്ളത്. ഓഗസ്റ്റ് 9 നു ശേഷം ഈ സജീവ കാലം ദുര്ബലമാവാനാണ് സാധ്യത.
പ്രളയസാധ്യതയുണ്ടോ?
എന്തായാലും ഇതിനു മുമ്പത്തെ രണ്ട് വര്ഷങ്ങളെ അപേക്ഷിച്ച് ഈ വര്ഷം പശ്ചിമ ശാന്തസമുദ്രത്തിലെ ടൈഫൂണ് ആക്ടിവിറ്റി വളരെ കുറവാണ്. മാത്രമല്ല, പശ്ചിമഘട്ടത്തില് ഏത് പ്രദേശത്താണ് തീവ്രമഴ ഉണ്ടാകുക എന്നത് ബംഗാള് ഉള്ക്കടലില് നിന്നും ഇന്ത്യന് കരപ്രദേശത്തേക്ക് നീങ്ങുന്ന ന്യൂനമര്ദങ്ങളുടെ തീവ്രതയേയും സഞ്ചാര പാതയേയും ആശ്രയിച്ചതാണിരിക്കുന്നത്. അതിനാല് കേരളത്തില് ഈ വര്ഷം ആഴ്ചകളോളം നീണ്ടുനില്ക്കുന്ന പെരുമഴക്കുള്ള സാധ്യത ഇന്നത്തെ സാഹചര്യത്തില് കുറവാണെന്ന് അനുമാനിക്കാം. കൊവിഡ് പശ്ചാത്തലത്തില് ചെറിയ വെള്ളപ്പൊക്കങ്ങളും, മണ്ണിടിച്ചിലും, ഉരുള്പൊട്ടലുകളും പോലും ദുരന്ത നിവാരണ പ്രവര്ത്തനങ്ങള് ദുഷ്കരമാക്കും. ഇത്തരം സാഹചര്യങ്ങള് മുന്കൂട്ടി കണ്ടുകൊണ്ടുള്ള അടിയന്തര ഇടപെടലുകള് നടത്തേണ്ടതാണ്. മുന്പ് സൂചിപ്പിച്ചു തേപാലെ ജൂണ്-ജൂലൈ മാസത്തെ മഴക്കുറവ് ഓഗസ്റ്റ്-സെപ്റ്റംബര് മാസം പരിഹരിക്കപ്പെട്ടില്ലെങ്കില്, കാലാവസ്ഥാ വ്യതിയാനത്തിന്റെ ഭാഗമായി ഒരേ സീസണില് തന്നെ പ്രളയവും വരള്ച്ചയും നേരിടേണ്ട അവസ്ഥയും മുന്നില്കണേണ്ടതാണ്.
എന്നാല് ഇപ്പോള് ലഭിക്കുന്ന 10 സെ.മിന് മുകളില് മഴ ലഭിക്കുന്നത് ഡാമുകളുടെ വൃഷ്ടി പ്രദേശങ്ങളില് വാനപ്രദേശങ്ങളിലും മലയോര മേഖലകളിലും ആയതിനാല് അടുത്ത ദിവസങ്ങളിലും 10 മുതല് 20 സെ.മിവരെ മഴ ലഭിക്കുവാനുള്ള സാഹചര്യം ഗൗരവത്തില് എടുക്കേണ്ടതാണ്. ഇപ്പോള് ബംഗാള് ഉള്ക്കടലില് രൂപം കൊണ്ട ന്യുനമര്ദം വളരെ വേഗത്തില് പടിഞ്ഞാറു ദിശയില് നീങ്ങുന്നതിനാല്, ഒരു പക്ഷെ ഓഗസ്റ്റ് 7 നു ശേഷം മഴ കുറയാനും സാധ്യത കാണുന്നു. എന്നാല് മറ്റൊരു മണ്സൂണ് മഴപ്പാത്തി വീണ്ടും സജീവമായാല് 8 - 9 വരെയും മഴ ലഭിക്കാം. ഈ അവസരത്തില് കൂമ്പാര മേഘങ്ങള് ഉണ്ടാകുവാനുള്ള സാഹചര്യമുണ്ടായാല് ചുരുങ്ങിയ കാലയളവില് ലഭിക്കുന്ന വലിയ മഴയും ഒരു ഭീഷണിയായേക്കാം.
Article and Data Courtesy : Metabeat.com (https://metbeat.com/27/blogspage/)
#360malayalam #360malayalamlive #latestnews