സ്വർണക്കടത്തിന്റെ മുഖ്യസൂത്രധാരൻ; എം ശിവശങ്കറിനെതിരെ ഇ.ഡി കുറ്റപത്രം സമർപ്പിച്ചു
കൊച്ചി: കള്ളപ്പണം വെളുപ്പിച്ച കേസിൽ മുഖ്യമന്ത്രിയുടെ മുൻപ്രിൻസിപ്പൽ സെക്രട്ടറി എം ശിവശങ്കറിനെതിരെ എൻഫോഴ്സ്മെന്റ് ഡയറക്ടറേറ്റ് (ഇഡി ) കുറ്റപത്രം സമർപ്പിച്ചു. കേസിൽ ഇഡി സമർപ്പിക്കുന്ന രണ്ടാമത്തെ കുറ്റപത്രമാണിത്. മൂന്ന് ഭാഗങ്ങളായി തയ്യാറാക്കിയ കുറ്റപത്രത്തിൽ ആയിരത്തിലധികം പേജുകളാണുളളത്. ശിവശങ്കർ അറസ്റ്റിലായി അറുപതുദിവസം പൂർത്തിയാകുന്നതിന് മുമ്പ് കുറ്റപത്രം നൽകിയതിനാൽ അദ്ദേഹത്തിന് സ്വാഭാവിക ജാമ്യം ലഭിക്കാനുള്ള സാദ്ധ്യത അവസാനിച്ചു. ചൊവ്വാഴ്ചയാണ് അറസ്റ്റിലായിട്ട് അറുപത് ദിവസം പൂർത്തിയാവുന്നത്. ശിവശങ്കർ ഇപ്പോഴും റിമാൻഡിലാണ്. അതിനിടെ കളളപ്പണക്കേസിൽ ശിവശങ്കറിന്റെ സ്വത്തുക്കൾ കണ്ടുകെട്ടാനുളള നടപടി ഇഡി ആരംഭിച്ചു. സ്വത്ത് കണ്ടുകെട്ടാൻ ഇഡി കഴിഞ്ഞദിവസം ഉത്തരവിട്ടിരുന്നു. നടപടിയുടെ ആദ്യപടിയായി സ്വപ്നയുടെ ബാങ്ക് ലോക്കറിൽ നിന്നും സന്ദീപ് നായരുടെ അക്കൗണ്ടിൽ നിന്നും കണ്ടെത്തിയതുമുൾപ്പെടെ ഒരു കോടി എൺപത് ലക്ഷം രൂപ കണ്ടു കെട്ടിയിട്ടുണ്ട്. ഈ പണം ലൈഫ് മിഷൻ പദ്ധതിക്ക് വേണ്ടി എം ശിവശങ്കറിന് കൈക്കൂലിയായി നൽകിയതെന്നാണ് ഇഡിയുടെ കണ്ടെത്തൽ. മറ്റുസ്വത്തുക്കൾ കണ്ടുകെട്ടാനുളള നടപടികളും ആരംഭിച്ചിട്ടുണ്ട്.
#360malayalam #360malayalamlive #latestnews