ജയ് ശ്രീറാം ബാനറിനെ മറുപടിയുമായി ഡി വൈ എഫ് ഐ; നഗരസഭയുടെ മുകളിൽ ദേശീയ പതാകയുമായാണ് പ്രതിഷേധം
പാലക്കാട് നഗരസഭയിൽ ജയശ്രീറാം എന്നെഴുതിയ ബാനർ തൂക്കിയതിനെതിരെ ദേശീയപതാകയുടെ ബാനർ പ്രദർശിപ്പിച്ച് ഡിവൈഎഫ്ഐ പ്രതിഷേധം. നഗരസഭാ ഓഫീസിന് മുന്നിലേക്ക് മാർച്ച് നടത്തിയ ഡിവൈഎഫ്ഐ പ്രവർത്തകരാണ് ഓഫീസിന് മുകളിൽ ദേശീയ പതാക തൂക്കിയത്. വോട്ടെണ്ണൽ ദിവസം നഗരസഭാ ഓഫീസിന് മുകളിൽ ബിജെപി പ്രവർത്തകർ ജയ് ശ്രീറാം എന്നെഴുതിയ ബാനർ തൂക്കിയിരുന്നു. ഇതിൽ പ്രതിഷേധിച്ചായിരുന്നു ഡിവൈഎഫ്ഐ സമരം.നഗരസഭാ ഓഫീസിന് മുന്നിൽ തടഞ്ഞെങ്കിലും പൊലീസിനെ വെട്ടിച്ചോടിയ അഞ്ചോളം പ്രവർത്തകർ നഗരസഭാ ഓഫീസിന് മുകളിൽ കയറി ദേശീയപതാകയുടെ ബാനർ തൂക്കി.
ഓഫീസിലെ പ്രധാന ഗേറ്റിന് മുൻപിൽ ഡിവൈഎഫ്ഐ പ്രവർത്തകർ കുത്തിയിരുന്ന് പ്രതിഷേധിച്ചു. ഡിവൈഎഫ്ഐ ജില്ലാ സെക്രട്ടറി ടി.എം. ശശി സമരം ഉദ്ഘാടനം ചെയ്തു. ജയ് ശ്രീറാം ബാനർ സംഭവത്തിൽ കേസെടുത്ത പൊലീസ് അന്വേഷണം ആരംഭിച്ചു. വോട്ടെണ്ണൽ ദിവസം കൗണ്ടിംഗ് ഏജൻ്റുമാർക്കും സ്ഥാനാർത്ഥികൾക്കും മാത്രമേ പ്രവേശനമുണ്ടായിരുന്നുള്ളു. ഇവരാണ് ഇതിന് പിന്നിലെന്ന് കരുതുന്നതായി പാലക്കാട് എസ്.പി. എസ് സുജിത് ദാസ് പറഞ്ഞു. കേസിൽ അന്വേഷണം തുടരുകയാണെന്നും നടപടിയുണ്ടാവുമെന്നും എസ്.പി വ്യക്തമാക്കി.
#360malayalam #360malayalamlive #latestnews