ഇനി ഓണനാളുകള്‍; ഇന്ന് അത്തം

കോവിഡ് മഹാമാരിയ്ക്കിടയിൽ അതിജീവനത്തിന്റെ പ്രതീക്ഷകളുമായി ഒരു ഒരോണക്കാലം കൂടി. ഇന്ന് അത്തം പിറന്നു. വീടുകള്‍ക്കുമുന്നില്‍ ഇന്നുമുതല്‍ പൂക്കളങ്ങളൊരുങ്ങി. ചിങ്ങത്തിലെ ഓണനാളുകള്‍ കര്‍ക്കടകത്തിലേ തുടങ്ങി. അത്തംതൊട്ട് പത്താംനാള്‍ തിരുവോണമെന്നാണ് പറയാറ്. ഈ 10 നാളുകളെ കര്‍ക്കടകവും ചിങ്ങവും പകുത്തെടുക്കുന്നത് അത്ര അപൂര്‍വമല്ല. ഇക്കുറിയും അങ്ങനെയൊരോണമാണ്.

ഈക്കൊല്ലത്തെ അത്തത്തിനുമുണ്ട് ഈ പ്രത്യേകത. ഇക്കുറി 12, 13 തീയതികളിലായാണ് അത്തം നക്ഷത്രം കടന്നുപോകുന്നത്. ഉത്രം നക്ഷത്രം വ്യാഴാഴ്ച രാവിലെ 8.54 വരെ മാത്രമാണുള്ളത്. വെള്ളിയാഴ്ച രാവിലെ 8.01 വരെ അത്തം നക്ഷത്രമാണ്. അതിനാല്‍ വ്യാഴാഴ്ച തന്നെയാണ് അത്തം വരുന്നതെന്നാണ് ജ്യോതിഷരംഗത്തെ പ്രമുഖർ പറയുന്നത് .

കോവിഡ് ജാഗ്രതയുടെ നിയന്ത്രണങ്ങള്‍ക്കിടയിലെത്തുന്ന രണ്ടാമത്തെ ഓണക്കാലമാണിത്.  21 നാണ് തിരുവോണം. ഓണാഘോഷം നടത്തുന്ന പ്രമുഖ ക്ഷേത്രങ്ങളിലെല്ലാം ചടങ്ങുകള്‍ മാത്രമാണുള്ളത്. ഓണാഘോഷങ്ങള്‍ക്ക് തുടക്കമിടുന്ന തൃപ്പൂണിത്തുറയിലും ഇപ്രാവശ്യം അത്തം ഘോഷയാത്രയില്ല.