ശരീരത്തിൽ ഒളിപ്പിച്ച നിലയിൽ സ്വർണ്ണം കടത്താൻ ശ്രമം; ആശുപത്രിയിലേക്ക് കൊണ്ടു പോകവേ യുവാവ് രക്ഷപ്പെട്ടു
കൊണ്ടോട്ടി: ശരീരത്തിൽ സ്വർണം ഒളിപ്പിച്ചെന്ന സംശയത്തിൽ പരിശോധനയ്ക്കായി ആശുപത്രിയിലേക്ക് കൊണ്ടുവരുന്നതിനിടെ കസ്റ്റംസ് ഉദ്യോഗസ്ഥരെ തളളിയിട്ട് യാത്രക്കാരൻ രക്ഷപ്പെട്ടു. നിലമ്പൂർ നമ്പൂരിപ്പൊട്ടി സ്വദേശി മൂസൻ(20) ആണ് രക്ഷപ്പെട്ടത്.വ്യാഴാഴ്ച വൈകിട്ട് ദുബായിൽ നിന്നുളള എയർഇന്ത്യ എക്സ്പ്രസ് വിമാനത്തിലാണ് മൂസൻ കരിപ്പൂരിലെത്തിയത്.
സ്വർണമുണ്ടെന്ന സംശയത്തെ തുടർന്ന് കസ്റ്റംസ് പരിശോധനയ്ക്കായി മാറ്റി നിറുത്തി. ഇതിനിടെ,ശാരീരിക ബുദ്ധിമുട്ട് അനുഭവപ്പെട്ടതിനെ തുടർന്ന് കൊണ്ടോട്ടി സ്വകാര്യ ആശുപത്രിയിലേക്ക് കൊണ്ടുപോവുകയായിരുന്നു. എക്സ്റേ പരിശോധന കൂടി ലക്ഷ്യമിട്ടായിരുന്നു കസ്റ്റംസ് ഉദ്യോഗസ്ഥർക്കൊപ്പം ഇയാളെ ആശുപത്രിയിലേക്ക് എത്തിച്ചത്
ആശുപത്രിയിലെത്തിയ ഉടനെ സമീപത്തുണ്ടായിരുന്ന ഉദ്യോഗസ്ഥനെ തളളിമാറ്റി ഇയാൾ രക്ഷപ്പെടുകയായിരുന്നു. യുവാവ് ദേശീയപാതയിലെത്തി മഞ്ചേരി ഭാഗത്തേക്ക് പോവുകയായിരുന്ന ലോറിയിൽ കയറി രക്ഷപ്പെട്ടു.
ഔദ്യോഗിക കൃത്യനിർവഹണം തടസപ്പെടുത്തിയെന്ന കസ്റ്റംസ് പരാതിയിൽ ഇയാൾക്കെതിരെ കൊണ്ടോട്ടി പൊലീസ് കേസെടുത്തു. ഇയാൾ രക്ഷപ്പെട്ട ലോറി പൊലീസ് കസ്റ്റഡിയിലെടുത്തു. കൊണ്ടോട്ടിയിൽ നിന്നും കയറിയ യുവാവ് കൊട്ടൂക്കരയിൽ ഇറങ്ങിയെന്ന് ലോറി ഡ്രൈവർ പൊലീസിന് മൊഴി നൽകി.ഇയാളുടെ വീട്ടിൽ കൊണ്ടോട്ടി പൊലീസും മലപ്പുറം പ്രീവന്റീവ് കസ്റ്റംസും പരിശോധന നടത്തിയെങ്കിലും കണ്ടെത്താനായില്ല.
റിപ്പോർട്ടർ: കെവി നദീര്
#360malayalam #360malayalamlive #latestnews